ळोक तिवार ‘इगास’ पर मुख्यमंत्री न खींचि द्यायी ळम्बी ळैन

उत्तराखण्ड क ळोक तिवार ‘इगास’ पर सरकारि छुट्टी कैरिक प्रदेस का मुख्यमंत्री पुष्कर सिंह धामी न एक ळम्बी लैन खीच द्यायी। धामी क ऐ फैसळाळ जख प्रदेस के रैवासियों क भावनाओं क सम्मान ह्वै वखि ऊ ळोगु थैं जवाब मिळि ग्यायी जू ळोक तिवार क नौं पर अपड़ि राजनीति चमकाणा छायीं।

उत्तराखण्ड क इतिहास मा पैळि बार ह्वै जब हमरा ळोक त्वार पर सरकरि छुट्टी ह्वै। धामी सरकारक ऐ फैसळन तय ह्वै ग्यायी कि औण वाळा साळु मा इगास पर छुट्टी कू फैसळा खूंणि आदेश जारी नि करण प्वड़ळु। दगड़ा-दगड़ि धामी क ये फैसळ थैं हमरि ळोक संस्कृति अर परम्पराओं थैं बचाणा खूंणि ऐतिहासिक मन्ने जाळु। धामी सरकार क ये फैसळा मा एक बात खास बात या च कि सरकारन अपडु विशेषाधिकार क प्रयोग कायी अर इतवार खूंणि प्वड़णि वळि इगास क छुट्टी थैं सोमवार कैरि द्यायी। जन्न कैकि प्रदेस क रैवासि अपड़ा गौं मा जै कैकि इगास कु तिवार मन्यें सक्यां।

उत्तराखण्ड बणणा क बाद से हि प्रदेस क रैवासियों क लगातार मांग हूंणि छायी कि सरकार हमरू लोक त्योवार ‘इगास’ थैं खूब प्रचारित कर्या। जै से हम ऐ ळोक त्योवार थैं बच्यें सक्यां। प्रदेस मा अब्बि तक क सरकारून ऐ बारा मा कुछ भि नि कायी। द्वी दशक क मांग थैं प्रदेस क युवा मुख्यमंत्री पुष्कर सिंह धामी न अपड़ि मजबूत इच्छाशक्ति दिखें कि पूरू कैरि द्यायी। धामी न गढ़वळि मा ट्वीट कैरिक प्रदेस क रैवासियों से धूमधाम से इगात तिवार मणाण क आह्वान कायी।

मुख्यमंत्री क ऐ फैसळक केंद्रीय रक्षा राज्य मंत्री अजय भट्ट अर राज्य सभा सांसद अनिळ बळूनी त खूब बण्यें कायी।

400 साळ पुरणू तिवार
पुरणीं मान्यता च कि 4000 साळ पैळि वीर माधो सिंह भण्डारी न टीरि, उत्तरकाशी, जौनसार अर श्रीनगर मा सब्बि जगा बटि सेना बुल्लें कि एक सेना त्यार कायी अर तिब्बत पर हमळा कैरि द्यायी। उन्न तिब्बत क सीमा परी मुनार गाड़ दीं। तबि वख ह्यूं पोणन बैट्ठि ग्यायी अर सब्बि बाटा बन्द ह्वैग्यीं। ब्वळें जाद क वै साळ सर्या गढ़वाळ मा दिवाळी नि मन्यें ग्यायी, 11 दिन बाद जन्नि माधो सिंह भण्डारी लड़ै जीतिक वापस ऐ, त सर्या गढ़वाळ मा दीवळि क तिवार मन्यें ग्यायी, तब्बि बटि गढ़वाळ मा कार्तिक क मैना मा एकादशी खूंणि ‘इगास’ बग्वाळ क तरौं मा मन्यें जांद।