मोदी सरकारा 9 साल, कांग्रेस न कचोरि, धामी सरकार बटि करनि नौ सवाल

देरादूण। केन्द्र मा भाजपा सरकार क नौ साला कु कार्यकाल पुरु ह्वैग्यें। ऐ मौका फर सर्या देस मा भाजपा ‘9 साल उत्कृष्ट’ कार्यक्रम उर्यें की मोदी सरकार क 9 साळु का कामु तैं देसा जनता तैं बतौंणि च।

उत्तराखण्ड प्रदेसा मा धामी सरकार अर भाजपा संगठन गौं-गौं तक ळोगु तैं या बात बतौंणि च। त वखि दुसर तरफि कांग्रेस क प्रदेस अध्यक्ष करन माहरा न मोदी सरकार क 9 साल क कामु का बारा मा बोलि कि उन्न धामी सरकार बटि नौ सवाल पूछ्यां छन फर अबि तक एक बि जबाव नीं मिलि।

माहरा न बोलि अबि हम जग्वाल (इंतजार) करण छा की भाजपा हमर पूछ्यां सवाळु क जवाब देलि।

करन माहरा न बोलि कि आज कांग्रेस क दगड़ा दगड़ि सर्या प्रदेसा जनता भाजपा बटि 9 सवाळु क जवाब मंगणि च पर अबि तक न त भाजपा के कै नेतान यु सवाळु क जवाब दे अर न भाजपा क कै प्रवक्ता न।

माहरा न पूछि कि 9 साळु मा भाजपा न 10 सरकारु तैं गिरौंणा कु काम किलै कायी? उन्न बोलि कि लोकतंत्रा क बात करणि वलि भाजपा तैं, यीं बातिकु जवाब बि दींण चैंद कि भाजपा न प्रदेसु मा राज्य सरकारु तैं पैसौं मा मूल्यें कि गिरौंणा कु काम किलै कायी? यांका पिछनै कारण क्या छायीं? माहरा न बोलि कि प्रदेसा रैवासी यु जणणु चान्दन कि अंकिता कतल मा कु वीआईपी छायीं? एस राजू तैं जांच करण से रवक्ण वलु कु नेता छायीं?

भाजपा क शासन मा पटवारी भर्ति घपरोळ अर पेपर लीक मामळा मा असली दोषी कोच?

उन्न बोलि कि जोशीमठ आपदा मा जन्न विस्थापन क काम हूंणा छन, वै फर भाजपा सरकार चुप किलै च? उन्न बोलि सवाल बौत छन, पर भाजपा क्वीं जवाब नी देंण च।