केजरीवाळ न द्यायी 300 यूनिट बिजळी मुफत मा देंणा कु भरोसु

देरादूण। भाजपा अर कांग्रेस मा सेटिंग-गेटिंग च। द्विया एक हि सिक्का क पहळु छन। द्विया पार्टी क नेतौंन अपडु् हि विकास कायी। या बात आम आदमी पार्टी क संस्थापक अर दिल्ली का मुख्यमंत्री अरविंद केजरीवाळ न आज देरादूण मा एक पत्रकार वार्ता मा ब्वाळ।

केजरीवाळ न ब्वाळ कि अगर हमरि पार्टी उत्तराखण्ड मा सरकार बणेंळि त हम प्रदेस मा 24 घण्टा बिजळी अर हर घार थैं 300 यूनिट बिजळी मुफत मा द्यूळा। अर पूरणा बिळ भि माफ कैरि द्यूळा।

उन्न ब्वाळ कि हम खाळी घोषणा नि करदा। यां खूंणि हमन पूरी त्यारि कैरि याळी।

पत्रकारू न जब केजरीवाळ से सवाळ कायी कि उत्तराखण्ड सरकार वित्तीय घाटा मा च तब मुफ्त बिजळी खूंणि पैसा कख बटि आळु। त केजरीवाळन ब्वाळ कि ऐ योजना मा 12 सौ करोड़ रुपयों क खर्च ह्वाळु। उन्न ब्वाळ कि उत्तराखण्ड त बिजळी पैदा करण वळु राज्य च, दुसर राज्य यख बटि बिजळी खरीदणां छन। उन्न ब्वाळ कि मुफ्त बिजळी मा 12 सौ करोड़ रूपयों का खर्चा ह्वाळु। अर उत्तरखण्ड क बजट 50 हजार करोड़ रुपया च। जबकि दिल्ळी मा 22 सौ करोड़ मुफ्त बिजळी कु खर्चा च। अर दिल्ळी बजट 60 हजार करोड़ रूप्या च। उन्न ब्वाळ कि जब हम 60 हजार करोड़ रुपयों बटि 22 सौ करोड़ रुपया बिजळी पर खर्च करद त उत्तराखण्ड मा त हम 12 सौ करोड़ रुपया मुफ्त बिजळी देंण खूंणि खर्च करै हि सकदो।

उन्न ब्वाळ कि एक माॅडळ च घाटाम चळण वळी सरकार अर एक माॅडळ च फैदा मा चळण वळी सरकार। उन्न ब्वाळ कि पैळि दिल्ळी सरकार सदनि घाटा मा चळदी छायीं। पर अब सर्या देस मा दिल्ळी सरकार हि च जू फैदा म चलणि च।

उन्न ब्वाळ कि अब उत्तराखण्ड क जनता थैं फैसळा करण कि ऊं थैं कै माॅडळ क सरकार चैंणि च।