157 इस्कुल्यां नौन्याळ भारत दर्शन शैक्षिक भ्रमण जातरा पर, मुख्यमंत्रिन दिखे झण्डा
मुख्यमंत्री धामिन आज शिक्षा निदेशालय देरादूण मा उर्यूं हाईस्कूल परीक्षा 2024म अपणा-अपणा ब्लौक मा पैलि नम्बर पर अयां 157 इस्कुल्यां बच्चौं की भारत दर्शन शैक्षिक भ्रमण जातरा तैं झण्डा दिखै कि रवाना कायी।
ऐ मौका पर मुख्यमंत्रिन बोलि कि इस्कुल्यां बच्चौं क या जातरा देसा रैवासियों तैं उत्तराखण्डा बारम बतौंणा कु काम बि कारला।
मुख्यमंत्रिन बोलि कि उत्तराखण्ड आज इन्ना फैसला लिंणु च जु सर्या देसा वास्ता भलु साबित हूंणा छन। उन्न बोलि प्रधानमंत्री न 9 नम्बर खुणि अपड़ा भाषण मा बि यांका बारम बोलि कि उत्तराखण्ड तैं प्रोत्साहित कायी। प्रधानमंत्रिन उत्तराखण्डा विकास कु महायज्ञ बतै। मुख्यमंत्रिन बोलि आज प्रदेस सरकार बोर्ड इमत्याना मेधावी इस्कुल्यां नौन्याळु तैं देसा ऐतिहासिक अर खास जगों कु भ्रमण पर भ्यजणि च।
मुख्यमंत्रिन बोलि कि यु भ्रमण प्रदेसा शिक्षा बन्दुबस्त मा एक नै अध्याय ज्वाड़लु। उन्न बोलि कि यीं सबि इस्कुल्यां नौन्याळ उत्तराखण्डा ब्रांड अम्बेसडर छन। यीं सबि इस्कुल्यां नौन्याळ प्रदेसा पवित्र नदी, देवस्थान, मौसम अर पर्यटन स्थलु का बारम जाणकारी द्याला। उन्न बोलि कि ह्यूंदा मैना मा चारधामा पाट बन्द हूंण बाद, भगवान ह्यूंदा प्रवासा जगा पर भगवाना दर्शन ह्वे सकदन। यांका वास्ता प्रदेस सरकारन ह्यूंदा मैना मा बि जातरा तैं सुरु क याली। उन्न बोलि कि इस्कूल्यां नौन्याळु या जाणकारी दे सकदन, जै से ह्यूंदा मैना मा बि लोग चारधाम जातरा कैकि पुण्य कमै सकदन।
मुख्यमंत्रिन बोलि कि यु शैक्षिक भ्रमण कार्यक्रम इस्कुल्यां नौन्याळु क सोच अर व्यक्तित्व विकास तैं बढ़ौंणा कु काम कारलु। उन्न शिक्षा विभागा अधिकारियों तैं बोलि कि जातरा क अनुभव बच्चौं से लिये ज्यां।
मुख्यमंत्रिन भारतीय भाषा सप्तै बधै द्यायी अर बोलि कि भारत विविधता म एकता कु उदाहरण च। भारतीय भाषा हमर भितर भारतीयता कु गौरव पैदा करदु।
मुख्यमंत्रिन विद्या समीक्षा केन्द्र कु दूसरु चरण सुरु करण अर निदेशालय म पाणि भ्वरणा दिक्कता वास्ता नाली बणौंणा घोषणा बि कायी।
ऐ मौका पर शिक्षा मंत्री डॉ. धन सिंह रावत, क्षेत्रा विधायक उमेश शर्मा काऊ, राजपुर विधायक खजान दास, कैंट विधायक श्रीमती सविता कपूर ,विभागीय सचिव रविनाथ रामन, महानिदेशक सुश्री झरना कमठान अर हौरि अधिकारी बि छायीं।