1094 कनिष्ठ अभियंताओं तैं मिलिन नियुक्ति पतर
देरादूण। मुख्यमंत्री धामीन आज वर्चुअल संस्कृति विभागम कनिष्ठ अभियन्ता सेवा परीक्षा, 2023 क जरिया विभागु म भर्ति हूंया 1094 कनिष्ठ अभियंताओं तैं नियुक्ति पतर दींन।
ऐ मौका पर मुख्यमंत्री न नै भर्ति कनिष्ठ अभियंताऔं दगड़ि वर्चुअल संवाद कायी। मुख्यमंत्री सब्यौं तैं बधै द्यायी अर बोलि कि तुमर जिन्दगि की एक नै सुरुवात च। तुमतैं अपणा ब्वै-बुबा, गुरु अर भगवान कु आशीर्वाद से देवभूमि उत्तराखण्डा सेवा करणा कु मौका मिलणु च।
मुख्यमंत्रीन बोलि कि 1094 अभ्यर्थियों तैं नौकरि मिलि यां से विभागु तैं हौरि मजबूती मिललि। उन्न बोलि कि ज्ञान, विज्ञान अर तकनीक कु जन खळाखळ विस्तार हूंणू च वे हिसाब से अप्पु तैं त्यार रख्यां अर सबि जिम्मेबरि से अपणु काम कर्या।
मुख्यमंत्रीन बोलि कि पिछल तीन सालुम सरकरि विभागुम 17 हजार से जादा नौकरि दिये ग्यायी। मुख्यमंत्री न बोलि कि 4 जुलै 2021 खुणि सौं लिंणा बाद पैलि कैबिनेट म हमन फैसला कायी कि प्रदेसा सबि खालि प्वड़या पदु पर भर्ति करै जाली। अर अबि बि भर्ति चलणि च।
मुख्यमंत्री न बोलि कि भर्ति इमत्यानु खुणि अधियाचन बिटि भर्ति पतर दिये जाण तकम लगणु वलु बगत तैं कम करै ग्यायी। सर्या साल भर्ति इमत्यानु कु कलैंडर बणै ग्यायी।
ऐ मौका पर कैबिनेट मंत्री सतपाल महाराज, प्रेमचन्द अग्रवाल, राज्य सभा सांसद नरेश बंसल, विधायक श्रीमती सविता कपूर, अपर मुख्य सचिव आनंद बर्द्धन, सचिव डॉ. रंजीत सिन्हा, एस.एन.पाण्डेय, डॉ. आर.राजेश कुमार, अपर सचिव रणवीर सिंह चौहान, श्रीमती रंजना राजगुरू, अतर सिंह, विनीत कुमार, निदेशक शहरी विकास नितीन भदौरिया अर विभागा अधिकारी छायी।