कम ह्वैळी गढ़वाल अर कुमौं क दूरी

देरादून। उत्तराखण्ड क मुख्यमंत्री पुष्कर सिंह धामी न दिल्ली मा पैळि राष्ट्रपति द्रौपदी मुर्मू क दगड़ मा भेंट कायी। यांका बाद उन्न केन्द्रीय सड़क परिवहन मंत्री नितिन गड़करी क दगड़ मा बैठक मा भाग ल्यें। द्वियों क बीच मा उत्तराखण्ड से जुड्यां प्रोजेक्टु का बारा मा छुईं हूंयीं।

बैठक मा केंद्रीय राज्य मंत्री सड़क परिवहन अर राजमार्ग मंत्रालय क जनरल वी. के. सिंह, सड़क परिवहन अर राजमार्ग मंत्रालय क अपर सचिव अमित घोष, उत्तराखंड शासन क प्रमुख सचिव आर. के. सुधांशु , केंद्रीय मंत्रालय राज्य सरकार क अफसर छायीं। केन्द्रीय सड़क परिवहन मंत्री नितिन गडकरी न उत्तराखण्ड क लैंफ-लैन ब्वळें जाण वळि ऑल वेदर रोड़ सड़क परियोजनाक कामु मा तेजी ल्याणा खूंणि बोलि।

बतै दियां कि 889 किमी लम्बु अर 12 हजार करोड़ रुप्यों के बणण वलि चारधाम सड़क परियोजनाक 53 कामु मा बटि अबि 41 थैं मंजूरि मिल ग्यें। जैमा 19 काम पूरा ह्वैग्यी अर 22 मा अबि काम चलणु च।

केन्द्रीय मंत्री न मंत्रालय अर राज्य सरकार क अफसरू थैं बोलि कि ऑल वेदर रोड परियोजना क काम मा कतई देरी नि हूंणि चैंद।

केन्द्रीय मंत्री न मुख्यमंत्री पुष्कर सिंह धामीक देरादूण मा रिंग रोड़ बणाणा क मांग फर सर्वे कर्यें जाणा क मंजूरी भि दे द्यायी।

नजीबाबाद-अफजलगढ़ बाई पास थैं बि मिलि मूंजरी

मुख्यमंत्री क मांग पर कुमौं अर गढ़वाल क बीच मा दूरी कम करणा खंूणि नजीबाबाद अफजलगढ़ बाईपास जैकि लम्बैं 42.50 किमी. च थैं बि मंजूरि दियंे ग्यें। बाईपास बणण से कुमौं अर गढ़वाळ क दूरी मा 20 किलोमीटर क दूरी कम ह्वै जाळी। अर 45 मिनट कु बगत बि बच्चि जालु। यांका दगड़ा-दगड़ि मझौला बटि खटीमा तक चार लैन सड़कि थैं बि मंजूरि दियें ग्यें।